2
Hetetamen keil umai keke avahouhou min tivava Iesu suval asuv houlu onen Siu keil
1 Iesu avasi en meteimal ten out Betlehem✡ Luk 2:4-7 en provins ten out Sudea, en avong koa Mari Herod vi asuv houlu ten provins enek.✡ Luk 1:5; 3:1 Ka katau en hasuen onen Iesu, hetetamen tei keil aka en out ist ka umai akistal en taon ten out Serusalem. Koakeil enek ales hitu keil keke avalei kilea asa koa hekur out en out netan. 2 Ka navong arokol Serusalem, amul avis meatin keil avit, “?Titiali koa avasi vi asuv houlu onen Siu keil mul kave? Veni avong mero veah en out ist, komai meles hitu onen✡ Nam 24:17; Mat 2:9 kistal rohtoh. Sakini, memai suk keke mevahouhou mini.”
3 Navong asuv houlu Mari Herod raeng koteh longlongien koanek, mundemko houlu ral min meatin vasi keil emun koa aro en out Serusalem.* Mari Herod mundemko houlu veni en rovattei meatin sav vasak visi vakur vulin. Ka meatin vasi keil koa aro en out Serusalem amundemko veni ametaun vurohien onen Herod koa mu vini ahin onen ka tei en natnali keil kati tuai. 4 Sakini Herod vise ruain asuv keil onen pris keil ka tiser keil ten mengkatien onen Mosis ka vis keil vit, “?Mesaea koa Ahi vat kati min Siu keil, ihasi en out kave?”
5 Ka keil avit risi mini avit, “Ihasi en meteimal ten out Betlehem✡ Sion 7:42 en provins ten out Sudea, veni Ahi viteni ka en tisien onen provet tai onen vit,
6 ‘Avaseini keke vatiamal onen Betlehem vi havivi mok en vatiamal sav keil onen me-Sudah keil,
ka nisakin asuv houlu tai hekistal en vatiamal koanek.
Kei helosil kat revi meatin keil onak ten out Isrel.’ ” Maeka 5:2
7 Navong asuv houlu Mari Herod longe mukok, vise lelau en hetetamen keil enek koa alei kilea asa koa kur out ka en hitu keil umai veni. Evus, vis revi keil en avong sa varei keil ales hitu koanek kistal rohtoh eni. 8 Evus, Herod sila keil uva en out Betlehem ka viteni min keil vit, “Miheha ka mihelekat revi titiali enek. Navong mihehotini, mihemai ris mihehiteni minau, keke inau mun niha ka nihouhou mini.”
9-10 Navong hetetamen keil enek araengon asa koa asuv houlu viteni min keil, uva keke avahotin titiali enek. Ka navong amusil sise one uva, hitu✡ Mat 2:2 koa alesi navong aro veah en out ist kistal eris. Ka navong keil ales hitu koanek, asi keil houlu mok. Hitu koanek muloh mulamu en keil ka vati mal en out varei koa titiali ro ien. 11 Navong keil uva neim, ales titiali keilu Meri, mama onen. Ka navong ales titiali enek, aretengeiril ka uva netan mini. Evus, alah lat more sanien keil one ka asani mini. Asan gol, frangkansen, ka mir.† Gol vi ahat tai koa vilahil houlu koa mulamu amumoni vi mani. Frangkansen ka mir luvi toeai koa amumon senta eni. Mani ten keitel vi nesa ka telvi sanien koa mal keke avasani min asuv houlu tai.✡ Luk 2:16; Sam 72:10-11,15; Aes 60:6 12 Ka, en vongien enek, Ahi sel kat keil en matil vovoien tai vit irvatei mun avales Mari Herod. Sakini amusil sise sav uva ris en kantri one.✡ Mat 2:22
Ahi mumon sise keke titiali Iesu heha Isip vating koe moulien onen
13 Navong hetetamen keil enek uva, angelo tai onen Ahi Asuv kistal ven Siosep en matil vovoien tai ka viteni mini vit, “!Kimea! !Kikalah kikur titiali ka mama onen ka mithelohosai mitheha en out Isip! Mitheto en out enek hetokol avong koa nihiteni keke mithemai ris. Kumoni veni, hervitei tuetin, asuv houlu Mari Herod helekat titiali koanik keke vouasi vamat.”✡ Mat 1:20; 2:19
14 Sakini, en vongien enek varei, Siosep mea vus titiali ka, keilu mama onen, tellohosai telva en kantri ten out Isip. 15 Telro en out enek sua vahis rokol avong koa alonge keke asuv houlu Mari Herod mat. Tounah enek kistal vasakin selusien koa Ahi Asuv viteni ka en provet Hosea vamai vahi anatin koa vit, “Navise natkuli hemea ran out Isip.” Hosea 11:1
16 Navong Herod lei kilea keke hetetamen keil enek aluvosi, tin katiat vis katiat. Sakini, sila meatin tavaeen keil onen uva en out Betlehem ka out vasi koa vesesal en out enek keke avou vasin titiali keil eni koa avi meahos koa sua one elu ka vita netan. Mumoni mukonek musil avong kati koa meatin keil ten hitu aviteni min Herod keke ales hitu enek kistal rohtoh eni. 17 Tounah keil enek sakin asa koa Ahi viteni ka en provet Seremaea mai vi anatin koa vit,
18 “Meatin keil ten out Rama araengon tounah tai,‡ Rama vi out tai koa, mulamu, arahin Resel, ahin onen Siekob eni. Out enek vesesal ven meteimal ten out Betlehem.
along verien ten tangien koa keih.
Resel raleh matien onen titan keil.
Ka seseini avahat lat ris rendemien onen,
veni titan keil avupuol varei.” Seremaea 31:15
Ahi mumon sise keke Iesu hemai ris ran kantri ten out Isip
19 Navong telro veah en out Isip, Mari Herod mat. Sakini angelo tai kistal ven Siosep en matil vovoien tai✡ Mat 1:20; 2:12 20 ka viteni mini vit, “!Kimea! Kikalah kihous titiali, ka kamil mama onen, mitheha ris en atan ten out Isrel, veni koakeil avit avou vini titiali enek, umat tuai.”✡ Eks 4:19 21 Sakini, Siosep mea vus titiali, ka keilu mama onen, telva ris en atan ten out Isrel.
22 Ka navong Siosep raengoni keke Arkelaos kur vulin tata onen, Mari Herod, mai vi asuv houlu ten provins ten out Sudea, kei metau keke telvaha en out enek. Ka Ahi sel kati en matil vovoien tai✡ Mat 2:12 keke nahatei en out Sudea. Sakini, telva en provins ten out Kaleli 23 ka telro en out enek en taon ten out Nasaret.✡ Mak 1:9; Luk 1:26; 2:39; Sion 1:45-46 Sakini asa koa Ahi viteni ka en provet keil mai vi anatin koa vit, “Ihise en koan Nasaret.”§ Arkileatei keke selusien enek ka provet kave.
*2:3: Mari Herod mundemko houlu veni en rovattei meatin sav vasak visi vakur vulin. Ka meatin vasi keil koa aro en out Serusalem amundemko veni ametaun vurohien onen Herod koa mu vini ahin onen ka tei en natnali keil kati tuai.
†2:11: Gol vi ahat tai koa vilahil houlu koa mulamu amumoni vi mani. Frangkansen ka mir luvi toeai koa amumon senta eni. Mani ten keitel vi nesa ka telvi sanien koa mal keke avasani min asuv houlu tai.
✡2:11: Luk 2:16; Sam 72:10-11,15; Aes 60:6
‡2:18: Rama vi out tai koa, mulamu, arahin Resel, ahin onen Siekob eni. Out enek vesesal ven meteimal ten out Betlehem.
✡2:20: Eks 4:19
✡2:23: Mak 1:9; Luk 1:26; 2:39; Sion 1:45-46
§2:23: Arkileatei keke selusien enek ka provet kave.