Levitikas
1
Iahova san mengkatien keil onen en usite ten sanien votut keil
Levitikas 1:1-9
Navong Iahova mul en Eim Tavolin, vise Mosis va vesesal veni ka selus mini vit, “Kiselus min me-Isrel keil ka kisan mengkatien keil usil sakien ten sanien min keil kihit, ‘Navong meatin etai hesan buluk vuo sipsip vahi sanien onen, hekur buluk, sipsip, vuo nani tai esen. Munak tai, sanien onen vi buluk, hekur buluk koa meahos koa aven heto, tounah tovuol hekula. Kei helamuni heha en metareh ten Eim Tavolin onak. Hesakini, inau, Iahova, nikur buluk koanek en usite koa vi onen keke hemal en metok. Meatin enek heling hen en vatin buluk vatie lati keke ling tisaen keil onen mul ien. Hesakini navong buluk mat, inau nilesi keke meatin enek mal en metok ka methos onak hel ien. Kei hou vini buluk onen en out enek ka natnali keil onen Eron koa avi pris keil itie ran minau, Iahova. Evus, hekukuvin eni heha en vali ahor ten sanien koa mul vesesal en metareh ten Eim Tavolin. Hevus, meatin enek houul lat hiliven buluk ka heteh lin vuseri teni. Pris keil isak mesein av en ahor ten sanien ka initi. Navong ahang mukan, pris keil iling revi vatin buluk, amur teni, ka vuseri sav keil teni. Meatin enek hekas motein alen ka tina keil teni, ka pris koa mul mumon sanien enek henit lin vasi sanien keil onen en ahor ten sanien. Ka vite ten sanien enek hetahos imok minau, Iahova.’ ”
 
Ahi vit kilea min Mosis sakien koa meatin keil akilea avasan sanien sav keil one mini: suval sipsip, nani vuo ame. Ahi viteni keke meatin keil isani min pris keil avou vini ka initi en ahor ten sanien. Sanien votut keil enek hesakin methos onen Iahova hel en keil, ka ito en tomat hetal mini.