40
Sua vahis muli va, ka en avong tai, meatin toumien elu onen asuv houlu ten out Isip lumum romaltei en meten. Tai vi avat onen meatin koa amutah uaen omon, ka tamun vi avat onen meatin keil koa amul aran veret an. Ka ven tounah tai, tin kat keilu ka ling keilu en hen asuv ten meatin taleikokoeien keil koa lei kat eim takeih onen, out koa Siosep ro ien. Ka kei ling keilu esuk en hen Siosep helei kat keilu. Luro ral mini avong taveah neli.
En vongien tai, meatin keilu enek lumatil vovoi. Matil vovoien onealu tateisav ka aneite teni mun tateisav. Navong Siosep mai ven keilu en visokon, les keilu lumundemko houlu. Sakini vis keilu vit, “?Vensa namil langlangis kosa?”
Keilu luvit, “Komal vasi melmatil vovoi, ka meatin tovuol ekok vata usili.”
Ka Siosep viteni min keilu vit, “Ahi enges kilea vahit luvat matil vovoien keil. Matil vovoien onamil, luhiteni minau.”
Sakini avat onen meatin koa amutah uaen vit, “En matil vovoien onak, nales vati grep tai 10 koa angoite etel. Ka navong son oute, hatte tas ling hungeite ka heite keil umen. 11 Navuli kat veiuaen onen asuv houlu ten out Isip ka nalah hei grep enek, navuhus eni va ien. Evus, nasani mini.”
12 Siosep vit, “Aneite ten matil vovoien onom mukok: angoi grep etel, aneite teni vi avong etel. 13 En avong etel, asuv houlu hehisok kiha veni, hemaenuk kimaluv ran eim takeih, ka heling risuk en umen onom. Keik kisan veiuaen mini hesuval koa komumoni mini mulamu. 14 Ka napeahik, kindem kat nau li munak tounah vasi tahos minuk ka kihit usil nau min asuv houlu. Mukonek vahera kikataunau nimea ran eim takeih ekek. 15 Kihiteni mini keke meatin keil avenan nau enges ran atan onomai, me-Hibru keil. Kihiteni mun keke inau narmumon etai tounah vatisa vasakinau mato en eim takeih ekek.”
16 Navong avat onen meatin keil koa aran veret lesi keke aneite ten matil vovoien koa Siosep viteni tahos, kei suk vit lat onen mini vit, “Inau mun namatil vovoi. Navous ateli ten veret etel mul en vatuk. 17 Koa nesa varei, veret tetahos an asuv houlu amul ien, ka aman keil umai amul akani.”
18 Siosep viteni mini vit, “Aneite ten matil vovoien onom mukok: ateli koa etel, aneite teni vi avong etel. 19 En avong etel, asuv houlu hehisok kiha veni, hemaenuk kimaluv ran eim takeih, ka meatin onen keil itei koteh vatum. Itekei lat teiai onom en ai tai ka aman keil imai ka ian avem.”
20 Avong etel muli, ka vi avong amundem kat avong asuv houlu ten out Isip avasi eni. Sakini mumon mari anien ven hetetamen keil onen. Ka en avong koanek, kei sila meatin tai onen va, vamaen avat onen meatin keil tatah uaenien vatal avat onen meatin keil koa amul aran veret lumaluv ran eim takeih. Evus, kur keilu luva lumulomal en meten asuv houlu ten out Isip ral min hetetamen keil onen. 21 Kei ling ris meatin koa mutah uaen en vati umen onen eris, 22 ka en kei koa ran veret, sila meatin onen keil avuli kati, amu vini, ka arekei lat teiai onen en ai tai. Tounah keil enek kistal suval koa Siosep viteni. 23 Ka meatin tatah uaenien romundemtei mun Siosep, en vobongeni li varei.