2
Mosis avasi
Eksodas 2:1-15
En avong enek, meatin tai koa kistal en vatiamal onen Livae retalihe ral min ahin tai en mari vatiamal eris onen. Ka ahin onen kur titaealu tai koa vi meahos. Navong lesi keke tivava enek moreite mok, kei ling suaini avati etel. Umen 7:20; Hib 11:23 Ka navong lesi keke sakras emun valing suaini, kur ateli tai koa amumoni en vati oumunai koa marite. Evus, muta koe en koltar vasakini oai sakras vaha neim ien. Evus, ling tivava onen eni ka lingi sesai en vali Oaisal Nael koa oumunai tetaveah amoul ien. Evus, kei va. Ka ahinali tivava enek vati mul soutin neli vales asa vakula, isen Miriam.
En hati avong koanik, natnahin asuv houlu mita en vali oaisal vakul. Kei mita ral min atouli toumien onen keil ka amul akarahiti ka alei kokoe eni. Rovitei tuetin, atouli enek lei silat ateli enek en oumunai keil koa tetaveah ka sila atouli toumien tai onen vakuri. Navong sani mini, natnahin asuv houlu poh lat meten ka lesi keke titi ehon mul ien, mul mis. Kei en mahisi ka vit, “Kei vi ehon tai li onen me-Isrel keil.”
Navong ahinali titi ehon lesi mukok, mea visi vit, “?Maha mahis etai ahin Isrel vamai vatounat eni minuk?”
Ka viteni mini vit, “Tahos, kumoni.” Sakini atouli va, kur mama kati onen ehon mai veni. Natnahin asuv houlu viteni mini vit, “Kikur titi ehon ekek ka kisan susu mini. Navong helokovein susu, inau nikuri hehi onak ka nihul keik ven umen onom.” Sakini, kuri ka rounat eni. 10 Navong ehon enek mai mariso, kur risi ka sani min natnahin asuv houlu. Natnahin enek kur kani mai suval natnali kati Umen 7:21 ka ling isen vi ‘Mosis’ koa aneite teni vi ‘naleh lati’ veni vit, “Nihise hemukonek veni naleh lati ran oai.”
11 Sua houlu muli ka Mosis moul mai vi mari meatin tai. Ka avong tai, kei va mul sao en meatin onen keil ka lesi keke me-Isip keil asak purun me-Isrel keil en umen takeih keil. Lesi mun koan Isip mul mu vini koan Isrel tai, ka Mosis lei kilea vi tue tai. Umen 7:23-28; Hib 11:24 12 Mosis lei rahit out ka lesi keke meatin tovuol valesi, sakini mu vini koan Isip, rahin suaini en veien en out enek, ka va ris teim sen. 13 Out mulan eni, va ris ka les me-Isrel elu lumul lumuti keilu. Viteni min kei koa mum tisa vit, “?Vensa komul komuti ris tumali?”
14 Meatin viteni vit, “?Isei linguk kovi asuv onomai keke kovalei revi usite onomai? ?Kovit kovouas nau vasuval koa komu vini koan Isip nenganeh?”
Selusien onen sakin Mosis metau ka vit sasen eni vit, “Meatin keil akilea tuai asa koa namumoni.” 15 Ka navong asuv houlu ten out Isip raengon asa koa kur out, kei lekat sise vouas Mosis. Ka Mosis lohosai va soutin en atan ten out Midia. Umen 7:29; Hib 11:27
 
Navong Mosis rokol Midia, pris tai onen me-Mid keil koa isen Setro maen Mosis ro ral mini. Avong muli, ka pris san natnahin mini. Kei kur titan ka aling isen vi ‘Kersom.’ Ka Mosis kataun keil ka lei kat sipsip ese keil vesesal sua hanumau elu (40).

2:2: Umen 7:20; Hib 11:23

2:10: Umen 7:21

2:11: Umen 7:23-28; Hib 11:24

2:15: Umen 7:29; Hib 11:27