8
“Mihendem kat sise koa taveah en out volvol koa Iahova mulamun kami eni sua hanumau elu (40). Ka en avong keil enek, Iahova san sakvisien keil mai en kami keke helei kilea rendemien onami: mihesak mesein kami keke mivalong kat mengkatien keil onen vuo miherlong kattei. Kei sakin rendemien onami vita netan navong maen amai kat kami. Ka katau eni, san manna mikani. Manna enek vi heite hau, rosuvaltei anien sav keil koa kami vuo avu onami keil avaan kilea en avong mulamu. Kei mumoni mukonek vit vahisein kami keke meatin romoultei en anien enges. !Vuo! Meatin mul moul en selusien keil vasi koa ka en ren Iahova. Mat 4:4; Luk 4:4
 
11 “Mihelei kati keke emi navobongentei Iahova, Ahi onami. Minalokoveintei mengkatien keil onen koa nasani min kami kosa. Mihelong kat keil vasi. Hos 13:5-6 12 En avong koa hemai, vangomi hehil ka miheto hetahos en more eim keil koa mihoumoni. 13 Buluk ka sipsip esomi keil imai ihi houlu mok ka moulien onami hehilelau en mani ka tounah sav emun keil. 14 En avong enek, minavuttei kami. Emi navobongentei keke Iahova, Ahi onami, kei kulat kami mimaluv ran hen me-Isip keil navong mivi slev keil veah. 15 Kei varei mulamun kami en mari out volvol, out koa tisa mok koa tetal keil ka skopion keil amul ien. Oai emun tovuol ien, ka kei mumon oai kistal en ahat tai keke mimuni. 16 En out volvol enek, kei san manna mikani, anien tai koa avu onami keil telamu areingeingeni. Ka kei san avong takeih min kami vasak vis kami ka houmon rendemien onami heha netan. Mumoni mukonek vasakini, en keite teni, kilea vatokol kat kami en mormore tounah keil. 17 Hesakini, minandemtei minahit kami mikur tounah houlu en keihoen onami enges. 18 Mihendem kati keke Iahova, Ahi onami, kei enges san keihoen min kami mikilea mivahilelau en tounah keil. Kei mumoni mukok ven kei musil kat hatkatien takeih koa mumoni ral min avu onami keil telamu. 19 Emi navobongentei Iahova, Ahi onami, vuo minahilestei minousil ahi sav keil ka minahatei netan min keil. Munak mihoumoni hemukonek, miheilea keke kami vasi mihematmat. 20 Munak mirlong kattei Iahova, kei hou rasilin kami. Anatin, houmoni min kami vati sakien keil koa houmoni min vangi meatin keil koa aro en atan koa miheha ien.

8:3: Mat 4:4; Luk 4:4

8:11: Hos 13:5-6