6
Sakien onen slev keil koa amusil Iesu
Koakeil avi slev, tahos isan houhouen min masta one. Hesakini, meatin hetovuol heselus hetisa en isen Ahi ka hihiseien orer. Efes 6:5; Taet 2:9-10 Munak masta onen slev tai musil kat Ahi, slev enek nandem maentei veni lusukul vituai ka naselus karentei. !Vuo! Kei houm hetahos imok hetal mini veni hetamen koa mul katauni vi meatin tai onen Ahi. Sakini en hehati hesuval koa keilu luvi vatiamal tas. Timoti, kihisein meatin keil en tounah keil enek usili. Flm 1:16
Selkatien usil ahoung ten mani
Meatin keil koan amul avisein meatin keil en hihiseien taluvosien koa teisav ran hihiseien onen Iesu Kristo. Asa koa aviseini, rorie lattei sise koa Ahi en vati keke keil avousili. Kal 1:6-9; 2Tim 1:13 Munak meatin tei keil amul amumon sakien keil koa mukonek, rie lati keke avilelau en hasien ka arkileatei asa koa amul avit usili. Amunoun veni e vati mok avaselus retavoai usil titi selusien vasi keil usil tunien telamu onen Siu keil. Sakien koanik sakin hieluien, vurohien, hitusilien, ka rendemien tatisa vakat meatin sav. Lises amumon rea en keil eris. Ka ven amumon sakien enek tuetin, arlei kileatei mun asa koa vi anatin ka asa vi luvosien. Keil avisein meatin keil en sise keil koa amundemi akilea avamai avamal en meten Ahi eni veni amundemi akilea avakur mani houlu eni. 2Tim 3:8; 4:4; Taet 1:14
Ka tahos imok keke rehesi ir en asa koa Ahi sani min ir tuai navong romusil sise ten rovamai rovamal en meten Ahi. Hesakini rokilea rovales more tahosien en moulien orer. 1Tim 4:8; Plp 4:11-12; Hib 13:5 Avong avasi ir romai en out netan, rovi heite hon! Ka navong rehemat, rehehi heite hon emun! Ekl 5:15; Siob 1:21 Sakini, munak hati anien ka hati eisin omor mul, koanik rehesi ir veni. Pro 30:8 Meatin keil koa avi uti mani, akilea avoumon tisaen keke avakur mani eni. Sise ten mani suval ahoung koa vuli kat keil en rendemien ka envatien tatisa keil. Sakini, mul purun moulien one. Pro 23:4; 28:22 10 Anatin, envatien ten mani vi vatte ten vati sakien tatisa houlu. Houlu en meatin keil, mani leh rendemien one va soutin ran hihiseien ten anatinien usil Iesu Kristo. Ka kosa, aleh mahien houlu mai en keil ka asakin rendemien one mules muas keil.
Selkatien keke meatin keil onen Ahi ual en sakien koa tahos
11 Ka keik Timoti, veni kovi meatin onen Ahi, konousiltei vati sakien keil enek. !Vuo! Keik, kusil kat vati sakien keil koa Ahi en vati keke kovoumoni. Moulien onom hetolas, sakien keil onom hemal vasi. Kiling desien onom en Ahi, envatien onom hel en meatin sav keil. Avem namahtei, lises kilong kat Ahi. Ka kimerau en selusien onom. 2Tim 2:22 12 Sakien ten ualien onom en meten Ahi, kum hekeih, hesuval komuloh en lohlohien tai. Munak kum eni hemukonek, kikur kat uite teni koa vi moulien koa sakras vavus. Ahi visok kovakuri navong kovitehiten demkatien onom en meten meatin houlu. 1Kor 9:25-26; 2Tim 4:7 13 En meten Ahi, koa sakin tounah vasi keil ten out netan amoul, ka en meten Iesu, koa vitehiten anatinien usil kei min Pontias Paelet, Sion 18:36-37; 19:11 nasel katuk mukok: 14 kusil kat tounah vasi koa Ahi en vati kovoumoni. Konakur tuntei hihiseien onen hetokol avong koa Iesu Kristo, Asuv orer, hemai ris hekistal ien. 15 Hemai ris en avong koa Ahi hehiteni hemal.
Ahi etin, kei vi moreite ka tahos imok.
Kei sasen mul losil kat tounah vasi ten out netan,
ka hetetamen keil ka asuv keil emun, amul en hen. Dut 10:17; Rev 17:14
16 Ahi etin, kei sasen mul lises ka lisenges.
Ven muohien onen mariso,
meatin sakras vaha vesesal ka valesi. Sam 104:2; Eks 33:20
Meatin vasi keil isan houhouen mini ka ilei kilea keihoen onen lisenges!
Anatin.
17 Koakeil avilelau en tounah ten out netan, kisel kat keil anavuttei keil. Keil iling desien one en Ahi, analingtei desien one en tounah keil ten out netan koa kilea vavuol. Ven tahosien onen, Ahi enges san tounah vasi keil rovasi ir veni. Sam 62:10; Luk 12:20 18 Kisel kat keil umon tounah koa tahos. Keil ihilelau suk en more umen ka ihi hili meatin koa isan kataunien min meatin sav keil emun. 19 En sakien keil tetahos enek, keil koa avilelau en tounah, akilea avaling kat more tounah keil en out nesa. Tounah keil ten out netan hevupuol, ka more tounah keil enek hel lisenges. Navong amumoni mukok, amul akur moulien tai koa vi anatin. Mat 6:20
20 Timoti, kilosil kat revi umen koa Ahi lingi mul en hem. Konapiltei natal koakeil aselus en tounah tatisa keil koa romaltei en meten Ahi. Koakeil enek aviteni avit hihiseien one vilelau en ileilien, ka vilelau en luvosien enges. 2Tim 1:14; 1Tim 4:7 21 Meatin koan amusil hihiseien enek tuai. Sakini, armusiltei mun sise ten anatinien onen Ahi. 1Tim 1:6; 2Tim 2:18
Navisi keke more envatien onen Ahi heto ven kami.

6:1: Efes 6:5; Taet 2:9-10

6:2: Flm 1:16

6:3: Kal 1:6-9; 2Tim 1:13

6:5: 2Tim 3:8; 4:4; Taet 1:14

6:6: 1Tim 4:8; Plp 4:11-12; Hib 13:5

6:7: Ekl 5:15; Siob 1:21

6:8: Pro 30:8

6:9: Pro 23:4; 28:22

6:11: 2Tim 2:22

6:12: 1Kor 9:25-26; 2Tim 4:7

6:13: Sion 18:36-37; 19:11

6:15: Dut 10:17; Rev 17:14

6:16: Sam 104:2; Eks 33:20

6:17: Sam 62:10; Luk 12:20

6:19: Mat 6:20

6:20: 2Tim 1:14; 1Tim 4:7

6:21: 1Tim 1:6; 2Tim 2:18