Lologena Wo Kiena Ne
Yesu Kristo Nap̃a
MATIU
Siriyuia
Visayuena Na Tusi Nene
Komp̃asnen suniena plas na tusi nini
Tusi nini, “Lologena Wo Kiena Ne Yesu Kristo Nap̃a Matiu Siriyuia”, naga pisawal lologena wo sape Yesu, naga yaru nap̃a Ntewa pisaar pa kiena yeririna la nanua sumo rui sape yoko naga imi vena tamalia la. A e Yesu, navisaarena la nap̃a Ntewa pisaar pa kiena yeririna lala e Tusi P̃esa ana pimi m̃alivi narui. Yesu paeme e yo kiena lus nae Israel lala, a kiena lologena wo nene, naga pe kiela re ga poli, naga pe kiena yeririna punuga na yomarava nini.
Matiu mligan ruru komp̃asnen tusi la nene sum̃aga sanene. Naga pisayu p̃esania, nap̃a Yesu paeme, a naga pisayu m̃enaga nap̃a Yoane kea, a nap̃a Yermare kilalia. A siraunia, naga pisayu nap̃a Yesu siari kiena yum̃aena e yo nap̃a Kalele sum̃a pisawal ke lologena wo pa yaru lala, pian la, a kila ruru kiela inanena lala. Siraun nene, naga pisayu m̃ena nap̃a Yesu pa ma Yerusalem, amio suri la nap̃a Yesu kila maron e kiena legiena na olua maro. A naga pisayu maron nap̃a Yesu mare, a yoko mal sina.
Matiu pisayu nap̃a Yesu naga pe navianiena tai nap̃a po taulu navianiena tap̃ena lala a nam̃areraena na visawalen kinasnen navisaluaena kiena Ntewa sike e naga, a pisayu p̃elaga nap̃a Ntewa pimi pe P̃arin Sup̃e kiena ne kiena yeririna lala.
Suri la moki nap̃a Yesu pian la ea, Matiu milip̃ere kompas lima, sanene:
Yesu pian kiena yeririna lala metava e kunusa. E kiena vianiena nena, naga pisawal p̃elaga nap̃a yaru la monar akila, vena aimi nap̃a Ntewa ve kiela P̃arin Sup̃e. A naga pisawal kiela yum̃aena lala, ana taman pan la vena ayum̃aenia, a pisayu sur la nap̃a yoko atolia e luwasnen kiela maliena e yomarava viu nap̃a Ntewa imi ve P̃arin Sup̃enia. Kiena vianena la nene sike e marana na keviu lima vito tol marana na keviu olua.
Yesu pian kiena yeririna lualima taaga pa lua. A mila m̃areraena pan la vena ava avisawal kiena lologena wo va yaru tap̃ena lala. Navianena la nene sike e marana na keviu lualima.
P̃akaiwa la nap̃a Yesu pisa vena visayuen yaru la nap̃a Ntewa pe kiela P̃arin Sup̃e, e yomarava viu nap̃a yoko ava asike ea. P̃akaiwa la nene sike e marana na keviu lualima taaga pa telu.
Yesu pian kiena yeririna lala e p̃elaga nap̃a yaru monar kila vena tavevea. Navianena la nene sike e marana nakeviu lualima taaga pa orelu.
Yesu pian kiena yeririna lala, pisayu suri la nap̃a yoko imi m̃alivi e legiena maro, a e yomarava viu nap̃a Ntewa ve P̃arin Sup̃enia. Navianena la nene sike e marana na keviu lualima lua pa vari a lualima lua pa lima.
Komp̃asnen tus la nini
Repinane Yesu lala a Yesu paeme 1:1—2:23
Yum̃aena kiena Yoane Nakeena 3:1-12
Yoane kee Yesu, a Yermare tap̃alia 3:13—4:11
Yesu kila kiena yum̃aena e lepas nap̃a Kalele 4:12—18:35
Yesu moluwe Kalele pa ma Yerusalem 19:1—20:34
Legiena na maro kiena Yesu nap̃a kila kiena yum̃aena garu Yerusalem a yo la nap̃a lavisin ga Yerusalem 21:1—27:66
Yesu mal sina a kiena nalogena lala apisu naga 28:1-20
1
Repina ne Yesu lala
Luk 3:23-38
Yesu Kristo naga molue kome lus na yermarua keviu lalua kiena ne repina ne le Yu lala, nane Epraam naga sumo, amio Tepet nap̃a naga sirau. Repina ne Yesu la punu ga, la kiela kia sanini:
Epraam naga narina nap̃a Aisak.
Aisak naga narina nap̃a Sekop.
Sekop naga narina nap̃a Suta, amio wenla tap̃ena lala.
Suta naga narina lua, Peres amio wenla Saera, nap̃a lalua na ape kaora, nap̃a lalua na anela nap̃a Tam̃a.
Peres naga narina nap̃a Esron.
Esron naga narina nap̃a Ram.
Ram naga narina nap̃a Aminatap.
Aminatap naga narina nap̃a Nason.
Nason naga narina nap̃a Salom.
Salom naga narina nap̃a Poas, a Poas nene nap̃a naga anena Reap.
Poas naga narina nap̃a Opet, a Opet nene nap̃a naga anena Rut.
Opet naga narina nap̃a Sese.
Sese naga narina nap̃a Tepet, a Tepet nene nap̃a naga pe p̃arin sup̃e kiena ne le Israel lala.
Tepet naga narina nap̃a Solomon, a Solomon nene nap̃a anena, naga wona ne Uraea na sumo.
Solomon naga narina nap̃a Reopoam.
Reopoam naga narina nap̃a Apia.
Apia naga narina nap̃a Asa.
Asa naga narina nap̃a Seosepat.
Seosepat naga narina nap̃a Soram.
Soram naga narina nap̃a Usaea.
Usaea naga narina nap̃a Sotam.
Sotam naga narina nap̃a Eas.
Eas naga narina nap̃a Isakaea.
10 Isakaea naga narina nap̃a Manasa.
Manasa naga narina nap̃a Amon.
Amon naga narina nap̃a Sosaea.
11 Sosaea naga narina nap̃a Sekonaea, amio wenla lala. Ana e pogos kiena ne la nene narui, yaru lala na purvanua tap̃ena nap̃a P̃apilon apanon ap̃ure plan le Israel lala ava ayum̃ae korena garu P̃apilon.
12 Sekonaea naga narina nap̃a Seltiel, nane pogos nap̃a le Israel lala amiyum̃ae korena ke garu P̃apilon wa.
Seltiel naga narina nap̃a Serup̃apel.
13 Serup̃apel naga narina nap̃a Apiut.
Apiut naga narina nap̃a Eliakim.
Eliakim naga narina nap̃a Aso.
14 Aso naga narina nap̃a Satok.
Satok naga narina nap̃a Akim.
Akim naga narina nap̃a Eliut.
15 Eliut naga narina nap̃a Eliesa.
Eliesa naga narina nap̃a Matan.
Matan naga narina nap̃a Sekop.
16 Sekop naga narina nap̃a Yosop, nap̃a wona ne Maria. Maria nene, naga anenane Yesu, nap̃a apisape naga pe Navisaarena.
17 Siar e Epraam, teras lelei lala pimi tol Tepet, teras la nene tol lualima taaga pa vari. A siar e Tepet pimi tol pogos nap̃a le P̃apilon lala ap̃ure plan le Israel lala avanon ayum̃ae korena garu P̃apilon, teras lelei lala tol m̃ena ga lualima taaga pa vari, a siar e pogos nap̃a la asike garu P̃apilon, pimi tol Kristo, teras lelei lala tol ke sina ga lualima taaga pa vari.
Yesu paeme
Luk 2:1-7
18  Luk 1:27Suniena nini kiena ne Yesu Kristo, nap̃a naga paeme sanape, naga sanini: naga anena, sira nap̃a Maria, nap̃a la apisaaria sumo asape yokorena talopa amio yaru tai, kiena kia Yosop. Ana pogos nap̃a lalua pe atalopa re poli wa, Maria naga mlogekilale nap̃a naga m̃ep̃ena, na pimi kome Ninuna Wa. 19 A Yosop nap̃a la apisaaria apisape yokorena naga talopa amio Maria nene, naga pe yaru wo tai, a naga pe pisa re pisape Maria naga kila suri tai piowa poli. Ana naga pisu sane p̃isi na lalua na monar akilaro kiela navisaarena nene, ana naga sitom ke pisape kila ga e p̃elaga tai nap̃a malumu ga, vanon nap̃a naga yepen mavin kilaen Maria memawa manenea vanon suri nene. 20 A pogos nap̃a naga sitom ke sape kila sanene, naga m̃enia, pisu navisi tai kiena ne Ntewa m̃alivin naga, ana navisi nene pisa pania, pisape “Yosop, ko lus kiena ne Tepet, ko na ve ologe re viowagan nap̃a oure Maria ve wom̃a, vanon sisi nap̃a teke e naga, naga pimi ga kome Ninuna Wa. 21  Luk 1:31Yokorena Maria war narina yerm̃ene, a monar osikia kiena kia Yesu Natamaliaena, vanon yokorena naga warplan mlamulena viowa lala vetan kiena yeririna lala.”
22 Ana suri la nene pimi kakate sanene, vena kila visena kiena ne Ntewa tai vim ve lelaga, sa nap̃a Navisawalena Aisea naga pisawal sumo, 23 nap̃a naga pisape
“Yokorena sira m̃ee tai nap̃a yerm̃ene pe pisu re poli wa, naga m̃ep̃ena,
p̃isi na war narina tai ve yerm̃ene,
ana p̃isi na asikia kiena kia ve ‘Emanuel.’ ” Ais 7:14
Kia nap̃a “Emanuel” naga kana kinas sane “Ntewa sike amio ita.”
24 Pogos nap̃a Yosop tavilo sina, kila sa nap̃a navisi kiena ne Ntewa pisa pania, ana naga talopa amio Maria, p̃ere pe wona. 25  Luk 2:21Ana pe pa pisu re Maria tol pogos nap̃a Maria p̃arlua narina nene. A pogos nap̃a Maria p̃arlua sisi nene, ana Yosop sikia kiena kia “Yesu.”

1:18 Luk 1:27

1:21 Luk 1:31

1:25 Luk 2:21