Kalatia
Nalob̃ulat napisulan aPol totosi van hǝn alat a Kalatia
Ase itos nalob̃ulat napisulan egai?
APol itosi.
Itos nalob̃ulat napisulan egai hǝn nǝsa?
Itosi hǝn alat siYesu len naut gail a Kalatia lǝb̃eriŋ nǝlolit b̃idaŋ len aYesu ŋai, savi nahusurian hǝn nalo.
Itos nalob̃ulat egai m̃os ase?
Nalob̃ulat egai evi napisulan aPol totosi van hǝn alat siYesu len naut gail a Kalatia.
APol itos nalob̃ulat egai ŋais mai len naut a be?
APol itosi pǝpadaŋ hǝn nasihau A.D. 49 nǝboŋ totoh len naut a Antiok.
1) Na-ke-ivoi-an (1.1-5)
2) Mǝtosǝsǝloŋ hǝn nap̃usanan tosa (1.6-9)
3) Nǝdaŋan hǝn na-il-a-m̃o-an siPol hum ahai pispisul sua (1.10–2.21)
4) Nalo mai nadǝlomian (3.1-25)
5) Nau sǝhot navoian mai nǝmakuvan mǝttokade nǝboŋ mǝttogǝm vi natun aGot gail (3.26–4.7)
6) Tǝgau gat nǝmakuvan samito (4.8–5.1)
7) Mǝtb̃igol mǝtb̃ikad na-tiv-dalusi-an, mǝtotǝlmam hǝn mǝtb̃evi slev hǝn nalo tǝtas (5.2-12)
8) Mǝtehusur aNunun aGot, samtehusur naṽide tosa samit gail (5.13–6.5)
9) Nakelean todaŋ namǝkot: naṽit hǝn nǝsa mǝttogole dereh tibar gamito. Gol navoian! (6.6-10)
10) Na-tiv-dalusi-an savi natideh, b̃eb̃uer tu savi natideh (6.11-16)
11) Nasudǝlam̃ian (6.17-18)
1
Na-ke-ivoi-an
Ginau aPol novi ahai pispisul sua. Savi avan ideh totabtabuh len ginau, aoa, aYesu Kristo mai aGot aTǝman togol tole mǝhat dan nǝmatan, arutabtabuh len ginau. Ginau aPol, mai nǝbathudud nadǝlomian gegai, namtutos nalob̃ulat napisulan egai. Namtutosi van hǝn alat siYesu len navile gail a Kalatia.* Uman 16.6 Namtous ke aGot aTǝmadato mai Nasub̃ aYesu Kristo areviol kǝmas hǝn navoian mai gamito ale arigol nǝlomit tikad natǝm̃at. AKristo eriŋ gai len nǝmatan m̃os b̃ilav kuv gidat dan nǝsaan sidato hǝn b̃ilav kuv gidato dan nǝmauran tosa silat ta damǝŋai. Igole husur nalǝŋonian siGot aTǝmadato. Nǝ-sal-suhi-an tivan hǝn nǝyalyalan siGot vi sutuai sutuai! Ganan.
Na-kel-uri-an tovoi esua ŋai
Evi aGot tokis gamito hǝn mǝtb̃imaur len navoian aKristo toviol kǝmas hǝni, wake mǝtupair tutut dani van hǝn nap̃usanan totile. Nosǝhoṽut len gamito! Nap̃usanan enan savi na-kel-uri-an tovoi ideh. Ikad nǝvanuan galevis lotogol nǝnauan samito etuhatuh, lotolǝŋon lǝb̃emǝdas na-kel-uri-an tovoi seKristo. Be nukel mai gamit ke, avan ideh, naut kǝmas ginamit o aŋel togǝm len nǝmav, b̃ikel ur na-kel-uri-an tovoi totile dan na-kel-uri-an tovoi namttokel mai gamit tia, aGot m̃au tibar hǝni len nǝhab nǝmatan! Hum namttokele tia, nukel tasi am ke, avan ideh b̃ikel ur na-kel-uri-an tovoi totile dan enan mǝttodǝlomi tia, aGot m̃au tibar hǝni len nǝhab nǝmatan!
10 Ginau nǝsahisi ke nǝvanuan gail lǝb̃ehǝhaṽur hǝn ginau. Nolǝŋoni ŋai ke aGot b̃ehǝhaṽur hǝn ginau! Nǝtahishisi ke nǝvanuan gail lǝtahǝhaṽur hǝn ginau, asike nǝtavi aslev seKristo.
AGot ekis aPol
11 Bathudud nadǝlomian sagw, nukel koti mai gamit ke, nǝkadun na-kel-uri-an tovoi notokel uri, savi len nǝvanuan. 12 Husur avan ideh sǝlavi mai ginau, saṽusani hǝn ginau. Ao, aYesu Kristo sǝb̃on, ikel vǝhoti mai ginau.
13 Nokǝmaienan husur mǝtosǝsǝloŋ lǝboi tia naṽide hǝn nǝmauran sagw nǝboŋ notohusur naṽide hǝn nalotuan seJu gail. Ginau aPol, nomǝdas tabtab hǝn alat siGot hǝn lǝb̃imasig. 14 Len naṽide hǝn nalotuan seJu gail, ginau nosǝhor naJu isob̃ur len naur hagw. Nudaŋ habat len naṽide setǝmagw gail ta sutuai.* Hǝn naves 13-14, ris Uman 8.3, 22.3-5, 26.9-11
15-16 Len navoian toviol kǝmas hǝni, aGot ilekis hǝn ginau, ekis ginau nǝboŋ notopat len nabǝhaṽun anagw sal. Beti aGot ehǝhaṽur hǝn togol ke nolǝboi p̃arp̃ar hǝn aNatun san hǝn nǝb̃ikel uri mai alat lǝsavi Ju. Nǝboŋ togol tomaienan, nǝsǝsaṽsaṽut hǝn nǝb̃isor kitevi mai avan ideh, Hǝn naves 15-16, ris Uman 9.3-6, 22.6-10, 26.13-18. Isa 49.1; Jer 1.5 17 nǝsavi mǝhat vi Jerusalem hǝn nǝb̃eris alat lotovi ahai pispisul gail a m̃o hǝn ginau. Aoa, novi tut vi Arapia, beti notǝlmam vi lan naut a Tamaskus. 18 Husur nasihau totor notǝlmam vi Jerusalem hǝn nǝb̃elǝboi aPita mai nǝb̃inau sǝhot nǝsa b̃ikel mai ginau. Ale nutoh maii len nǝmariboŋ tovi 15. Uman 9.26-30. Len nasoruan ta Kris ike aKefas, tovi nahǝsan aPita len nasoruan ta Aram. 19 Nǝsaris ahai pispisul ideh am, be aJemes aṽan Nasub̃ ŋai.* Kal 2.9; Mat 13.55
20 Nǝsa nototosi van hǝn gamito ekitin. Len nǝhon aGot nukele, nǝsaliboŋ.
21 Beti husur nǝboŋ enan novi lan naut a Siria mai a Silisia. 22 Be alat seKristo len naut a Jutea lǝsabubur mai ginau, lǝsalǝboi ginau. 23 Losǝsǝloŋ hǝn na-kel-uri-an ŋai toke, “Atenan tomǝdas tabtab hǝn ginamit a m̃o, gagai ikel ur nadǝlomian egaii tomǝdasi a m̃o.” 24 Imaienan lusal suh aGot bathut nǝsa togole len ginau.

*1:2: Uman 16.6

*1:14: Hǝn naves 13-14, ris Uman 8.3, 22.3-5, 26.9-11

1:15-16: Hǝn naves 15-16, ris Uman 9.3-6, 22.6-10, 26.13-18. Isa 49.1; Jer 1.5

1:18: Uman 9.26-30. Len nasoruan ta Kris ike aKefas, tovi nahǝsan aPita len nasoruan ta Aram.

*1:19: Kal 2.9; Mat 13.55