13
Nap̃isal hǝn na-lǝmas-buni-an
Ginau nǝtasor len nasoruan tiltile nǝvanuan lotosorsor len gail, mai nasoruan tiltile aŋel lotosorsor len gail, be asike nǝtǝkad na-lǝmas-buni-an, nǝtǝwal kǝmas ŋai hum nǝb̃e o nabel lototuhtuhi. Nǝtǝkad nǝdaŋan hǝn nǝb̃ikel napisulan siGot, mai nǝtalǝboi sǝhot natit p̃isi aGot tosusuan gail mai nalǝboian p̃isi, ale nǝtǝkad nab̃iltidǝlomian hǝn nǝb̃igol naṽehuh lǝb̃erus, be asike nǝtǝkad na-lǝmas-buni-an, nǝtavi ut kǝmas ŋai.* Mat 17.20, 21.21; Mak 11.23 Nǝtaviol hǝn natit p̃isi notokade mai namǝsal gail, ale nǝtaviol hǝn nibegw hǝn nǝb̃isor sal suh ginau len Nǝboŋ siNasub̃,* Len natosian galevis ta sutuai ike, nǝtaviol hǝn nibegw hǝn b̃ipaŋ len nǝhab towunwun, be asike nǝtǝkad na-lǝmas-buni-an, asike nǝtǝkad natideh tovoi. be asike nǝtǝkad na-lǝmas-buni-an, asike nǝtǝkad natideh tovoi.
Naṽide hǝn na-lǝmas-buni-an imaiegai: Gǝb̃elǝmas bun avan ideh, len nǝ-daŋ-b̃uri-an gutoh mǝdau maii, gugol navoian b̃evi tarhǝt san, gǝsǝtab̃ulol bulosi sil natit san gotolǝŋoni. Gǝb̃elǝmas bun avan enan gǝsasor sal suh masuṽ hǝn gaiug, gǝsapul hǝn naṽivan, gǝsagol natideh b̃igol nahurun avan en b̃isa, gǝsǝnau gaiug gabag m̃os nalǝŋonian sam̃ ŋai, nǝlom̃ sǝpaŋpaŋ tutut, len nǝlom̃ gǝsatǝgau gat nǝsaan avan enan togole hǝn gaiug. Gǝb̃ikad na-lǝmas-buni-an gǝsahǝhaṽur hǝn nǝsaan, be gub̃on mai alat lotohǝhaṽur hǝn nakitinan. Gǝb̃ikad na-lǝmas-buni-an goil gǝgat tabtab, gotǝgau gat nadǝlomian tabtab, nǝ-vatvat-viri-an sam̃ sǝmasig boŋ ideh, gukad nǝ-daŋ-b̃uri-an tabtab.
Na-lǝmas-buni-an asike inoŋ boŋ ideh, ipat vi sutuai. Avil nakelean hǝn napisulan siGot dereh teb̃uer. Nasoran len nasoruan tiltile gail dereh tinoŋ. Nalǝboian hǝn nǝsa aGot tosusuan gail, dereh teb̃uer. Husur gagai datolǝboi kǝkereh hǝni ale gagai datukel kǝkereh hǝn napisulan siGot. 10 Be nǝboŋ aYesu b̃egǝmai hǝn aGot b̃igol vurvur natit p̃isi, naviolan aNunun aGot toviol hǝn gail gagai dereh leb̃uer.
11 Nǝboŋ notovi tǝtai, nusor sum̃an natǝtai, nabunusian sagw esum̃an nabunusian setǝtai, nunau sum̃an natǝtai. Nǝboŋ nototibau, notogǝm vi haṽut, noriŋ gab̃ulan naṽide galenan setǝtai. 12 Gagai datokǝta sum̃an nǝvanuan tokǝta tur len nakǝlas tob̃anub̃anw. Be len nǝboŋ enan, dereh datekǝta ris nǝhon aGot timasil buni. Gagai nalǝboian sagw ekǝkereh, be len nǝboŋ enan nalǝboian sagw dereh tikavkav sum̃an aGot tolǝboi kavkav hǝn ginau.
13 Imagenan gagai datimasgol tabtab hǝn natgalegai lototor: datimasriŋ gat nǝlodato len aGot, datimasvatvat vir natit p̃isi aGot tokel gati ke lǝb̃isarpoh, datimaslǝmlǝmas bun gidat gabag. Be len natgalen p̃isi, na-lǝmas-buni-an ivoi esǝhor eru enan.

*13:2: Mat 17.20, 21.21; Mak 11.23

*13:3: Len natosian galevis ta sutuai ike, nǝtaviol hǝn nibegw hǝn b̃ipaŋ len nǝhab towunwun, be asike nǝtǝkad na-lǝmas-buni-an, asike nǝtǝkad natideh tovoi.