M̃esi Napano
YEMESI
Naio Bivitauiaio
Verialiano Moti
Tukunuano bulati na niosi nei
Yemesi kiano m̃esi, naio bar iliano novo nalo napano ka verloglog Atua kiano tomu nalo napano aju beve terakurano ea vio nalo ea yetemeriba nei. Yemesi ber jamerjiano miroano ka rijai tomu nalo, ka ajev jidomiano a jikaiano novo bunu. Ea m̃esi nei naio berii vite miroano napano namoneano nalo monoka asidomkario a monoka alaio. Naio berinavo napano be talim̃asa, naio monoka saaro bogo na Atua midular naio binimei mave, a namoneano napano be sanibaiano, naio monoka saaro bogo na Atua midu naio jo yetano. Naio berii bajago novo napano toro monoka rilaio, a naio berinavo namoneano moneano bija im̃auano monoka ava vio takurano. Naio berinavo toro napano jo mila bajago novo nalo ka rijai tomu dolu nalo, mia kanano moneano jikili. Mia Yemesi berii vite nalo na amila vonvon toro, a naio berinavo toro napano vite nalo abinimei amila vonvonio jo ana naio bokar bajago memedu, naio mijikia rijog rivu. Mia naio berii bajago napano namoneano monoka re rila ea niono ka river vite va nalo, mia naio monoka rila ka riiaia Atua. Mia naio berii masouano napano Atua jianio, a bajago napano tomu nalo aju amila baravo, a bajago napano tomu nalo abe m̃arou laka, a bajago napano toro kiano jidomiano tebievi, a berii volkouano napano be kiano veridop̃eiano.
Vite burtumoruo napano Yemesi beriio ea m̃esi nei, nina im̃auano bija moneano, napano naljuo monoka avior biju ea namoneano nalo ka amijikia ala vite ka atakii Atua kiano jidomiano.
Torogio nalo na niosi nei
Iliano moti 1:1
Bajago na moneano bija na m̃asouano 1:2-8
Talim̃asa nalo bija sanibaiano nalo 1:9-11
Vite nalo na lavonvoniano na toro kiano moneano 1:12-18
Toro monoka rijog Atua kiano iliano vija monoka rila vite nalo napano iliano nei berenio 1:19-27
Iliano na tukovio ka toro napano bitii va ka toro dolu 2:1-13
Moneano bija im̃auano novo 2:14-26
Namoneano monoka vitikar vatitig ka kiano iliano 3:1-18
Namoneano bija bajago nalo na yetemerba 4:1—5:6
Vite dolu nalo napano Yemesi berenio 5:7-20
1
Iliano na be moti
1 Mat 13:55; Mak 6:3; Im̃auo 15:13; Kale 1:19Kiniou Yemesi, kiniou nobe toro na m̃a nemila Atua kiano im̃auano, a kiado Tubo Yesu Kristo kanano, napano nejirii m̃esi nei biedu ban kamiu, napano m̃a kube bajulukuti duelimo ba juo [12] na Israel, napano m̃a kumitua taara dedade nalo ea vio yetemeriba nei. ?Kiniou nebika neber jum̃abe, kamiu kumitu bo ga p̃eli na kumitu jum̃abe?
Viekouoiano bija m̃asouano
2 Kuruaku nalo a kuvivinioku nalo, mia bogo na vite na lavonvoniano nalo amei ea kamiu ka alavon kamiu, mia kumijikia kuvial lo tibe ka vite na jogvuiano ga. 3 Nina jibe ka kamiu kumijikia, ver bogo nam̃a vite milavon kenemiu viekouoiano, mia kumitu jikili dam̃ariga, nina rila kenemiu viekouoiano sikili lie vo ka mia kuvitumolu kuvitu bogo nonovio. 4 Mia bogo na m̃a kamiu kumitumolu kumitu jikili jibe na, nina mijikia rila kenemiu meuliano rimemedu rivu vatitigio, a rimeruo vatitigio, mia rivujo ka vite maraiu nonovio na abo, mia maka bajago novo tai na mia naio toa re.
5 Mia ver kamiu tai napano naio river kiano m̃asouano telisu ga mia monoka naio rivika den Atua ea kanano volkouano, ana mia Atua mijikia sian vanio. Bior ea Atua, kanano bajago maka rivitisa ea toro napano jom̃a bika vite nalo denio, naio jo jian ijaiano novo julaka ban tomu nalo ea kiano tinievuiano. 6 Mia ver bogo na m̃a toro naio jom̃a bika vite na jibe na ea kanano volkouano, monoka naio rimonea sikili, ka mia naio sidomii dede re bereio, bior toro na kiano jidomiano jibe na naio jibe ka tei napano m̃a bieveluo, napano m̃a jegi jom̃a jubon titigio janea vio reraio ga. 7-8 Toro na jibe na, kanano jidomiano beve juo, a kanano bajago nalo maka ajikia avu ga. Toro na jibe na maka rijikia sidom river mia naio rivokar tonovo tai ea Tubo.
Tomu na m̃a abe talim̃asa a tomu na sanibaiano
9 Kuruado nalo tealo, abe talim̃asa, maka ve kialo saba, mia nalo amijikia avarvarlo m̃ele bior Atua naio midular kialo jidomiano abavin mave. 10 A kuruado tealo bunu, nalo kialo saba toru, mia bo ka nalo avarvarlo m̃ele bunu, nina bior Atua mila kialo jidomiano ajutano ga. Amijikia asaaro tibe na bior abitilubar ka toro na be kanano saba toru, naio javukia niaiesi napano be tena bogo bulati ga. 11 Bogo napano m̃erenio bavin, naio bitunu m̃ele, mia naio tunu niaiesi nalo nei mia amekekeu, atibirbil, naruei niabene na bo avakovio. Mia ea bajago nene kia ga vo, ea bogo napano tomu na saba nalo ajum̃a amim̃auka abarbijii kanalo veru nalo kia ga vo, mia nalo ajoru avakovio.
Vite nalo napano m̃a amila lili kito
12 Toro napano jumolu ju jikili ea nalavonvoniano nalo napano abinimei eaio, ilivuiano joaio, bior ka bogo napano naio jovulu vite nalo nei ruei, mia Atua riyovovua vatitig naio ka ijaiano na bo laka, nina be meuliano napano Atua naio berkar ban kito ruei, ka kito napano tiniedojii naio toru. 13 Ver nalavonvoniano nalo nei amei ea kamiu, ana nalo ajukujuku kamiu, mia kamiu kuver re “Uerei, najukujukuano nei amaluvo ea Atua.” Mia maka kuvijikia kuver tibe na, bior maka vite tai naio mijikia rijukujuku Atua, a bajago na milavonvon toro, nina maka ve kiano bajago. 14 Najukujukuano nalo nei abinimei jikili ea toro ea ga bogo na ga kanano sidomvovaiano ga mijubolbolili naio ana buru naio bano. 15 Karina sidomvovaiano nei naio riluo rimei ve toru ana naio rivar kenerinio vijuku vovaiano, karina bogo napano vijuku vovaiano naio bunu riluo rimei ve toru, mia naio bunu rivar kenerinio be m̃ariano.
16 Kuruaku novo nalo, bo ka kamiu kuvitikar kamiu rivu ka kuvijamo ka re tomu nalo amei ka ajubolbolili kamiu. 17 Monoka kuvijikia ka vite novo nalo nonovio a ijaiano maraiu nonovio nalo, ajumolu den vio mave abinimei ea kito. Ajumolu den Atua napano m̃a jo jii yulu nalo nam̃a aju mave tiniabene, a yulu nalo nei, amijikia ajum̃a amijiajianilo julaka. Atua kiano bajago maka lele rivilig ve dolu bogo tai, bior naio maka lele rijikia riverenio rivilig taakano ka kito bogo tai leleio, ka mia tuvan kito ea melijokouo. 18 Ninei be Atua nene ga napano ea kiano jidomiano ga, naio mila kito robinimei robe kenerinio, bior kito romonea kiano ilirianiano, ka kito rojibe ka m̃ariesi na be moti garuei jukamu ka tomu telabo napano mia nalo amonea Kristo iorou.
Kito monoka romonmonea Atua kanano iliano
19 Kuruaku a kuvivinioku novo nalo, mia kamiu tiniemiu ribobogia re iliano nei, ka tomu nonovio monoka ala sop̃eli ka aiagago ka tomu nonovio monoka ala sop̃eli ka aiagago kanio, ana monoka aviju kiki ka aili. Ana ala sopeli re ka tinielo rimimi, 20 bior toro kiano tiniemimiano maka rijikia rila bajago na Atua kanano rimaluvo leleio. 21 Ver tibe na, kamiu monoka kuvuku bulag bajago va nalo a im̃auano va nalo den kenemiu meuliano, a monoka kuvidu kenemiu jidomiano ritotano yetano ka Iliano Lu napano naio mijikia rivurumeul ea kamiu, napano Atua mebija kar ea kenemiu iviso nalo ruei.
22 Kamiu monoka kuvila vaio napano Iliano Lu na naio berenio, maka rivu ka kuvitu kuvijubolbolili bereio kamiu ga a kamiu napano kumitu kumiagago kurano ga ka Iliano Lu nei, karina maka kuvila vite nalo napano naio berenio. 23 Nina javukia toro tai napano naio jom̃a bitii mirano ea mermerobi, 24 mia bogo napano naio barlaka bano, ka bogo bulati ga, mia naio tinieno bobogia bereio mirano jum̃abe. 25 Mia toro napano naio jom̃a bitii veve vatitig va joomo ea tuboiano novo nei napano mijikia rivuru bulag kito den kariano nalo, a naio riagago vatitig ka mia naio riagago re ga ka mia tinieno ribobogia, mia naio rimonmonea a naio riim̃aukanio, toro na naruei mia Atua riilivu ka naio ea kanano im̃auano nonovio.
26 Verver toro tai river naio be toro na moneano napano memedu, mia naio telanivuu vatitig re ka buruminano, naio jom̃a mijubolbolili naio ga bereio, mo kanano moneano be iakurano ga. 27 Ana bajago na moneano na memedu bo, a napano be riano bo ea Atua mirano, jibe nei: mia jau keiel selivivi ka keija kirikiou nalo a taanou nalo ka keijalo ea kialo meuliano kouo nalo, a kovokar kouo rivu kiamo meuliano, ka napano niamiamo nalo a bajago na kiri niagiago nalo na vio yetemeriba atokol lelanso re.